Кулун тутар 1 күнүгэр, күнүс 11:00 чаастан Нам нэһилиэгэр Олоҥхо дьиэтигэр Россияҕа норуодунай нэһилиэстэбэ, Саха Өрөспүүбүлүкэтигэр Ийэ, Нам улууһугар уһулуччулаах государственнай уонна политическай деятель М.К. Аммосов төрөөбүтэ 125 сылыгар уонна Аан Дойду дьахталларын күнүгэр даҕатан бу быыстапка тэриллиннэ.

Быыстапкаҕа Нам улууһун кыбытык уонна лоскутнай хайысхаҕа тигэр иистэнньэҥнэрбит талба талааннарын көрөр, от ыйын 20-30 чыыһылатыгар Москуба куоракка "Гостинай дворга" ыытыллар международнай лоскутнай тигии "Душа России" фестивальга хамыһыйа сүүмэрдииригэр ыытылынна.

Быыстпака сахалыы сиэринэн арчылааһынынан, тыыннаах доҕуһуол хомуска дьүһүйүүнэн, Нам "Кылыһах" төрүт дорҕоон бөлөҕүн, улууспут дьаһалтатыттан Абрамов Петр Васильевич, улуус культуратын уонна духуобунай сайдыытын салайааччыта Заровняева Елена Александровна уонна Дьокуускайтан Саха сирин норуодунай худуоһунньуга, Саха Өрөспүүбүлэкэтин култууратын үтүөлээх үлэһитэ Анна Николаевна Зверева эҕэрдэлэринэн быыстапканы үөрүүлээх быһыыга-майгыга арыйдыбыт.

Хатырык нэһилиэгиттэн “Кырадаһын” кыбытык тигии түмсүүтүн уран үлэлэрэ (чаппараахтар, паннолар уонна ат симэҕэ) сааланы киэргэттэ. Түмсүү салайааччыта Надежда Соропова. Бу күн биир дойдулаахпыт, чулуу киһибит  М.К. Аммосов төрөөбүтэ 125 сылыгар аналлаах панно тигэн киэҥ эйгэҕэ таһаардылар. Панноҕа Максим Аммосов мэтириэтэ, кини аатын сүгэр сүрүн объектар, оччолого салайа сылдьыбыт дойудаларын былаахтара, төрөөбүт арыыта уонна Иван Алексеев хоһооно сукуна матырыйаалынан таҥыллан оҥоһулунна. Сүдү үлэ дириҥ ис хоһоонноох, дьон хараҕын тардар, кэрэ көстүүлээх буолбутун ыалдьыт дьон сөҕүөн сөхтүлэр.

Биллэн туран маннык тэрээһиннэр дьону төрүт иискэ көҕүлүүр, өбүгэлиин ситимниир-сибээсиир, инникитин кэскиллээх үлэлэри ураты көрүүлэринэн иитэллэригэр, оҥорон таһаарыыларыгар олук буолар. Билиҥҥи сайдыылаах кэмҥэ бэйэбит үтүө үгэспитин умнубакка көлүөнэттэн көлүөнэҕэ утумнаан иитэн, тиэрдэн иһэрбитигэр төһүү буолар тэрээһиннэр.

Тэрээһин түмүгэр төрүт үгэспитинэн оһуохайынан түмүктээтибит.