Балаҕан ыйын 26 күнүгэр "Мир женщины Севера" региональнай  быыстапка Ил Түмэн саалатыгар САССР Автономията төрүттэммитэ 100, уһулуччулаах государственнай уонна политическай деятель, Саха Республикатын Судаарыстыбаннаһын туруорсубут, Казахстан, Киргизия республикатын салайбыт М. К. Аммосов 125, Россияҕа Культурнай Нэһилиэстибэ, СР Ийэ сылларыгар анаммыт, бу сайын дойду тэбэр сүрэҕэр ыытыллыбыт "Душа России" норуоттар икки ардыларынааҕы быыстапкаҕа Саха сирин иистэнньэҥнэрэ Саха Өрөспүүбүлүкэтин культуратын үтүөлээх үлэһитэ,  «Кубок мэра Москвы» (2008), Россия «Лоскутная мозаика» конкурсун лауреата (2009), Нам улууһун ытык киһитэ Анна Николаевна Зверева салалтатынан баран кыттыбыт үлэлэрин быыстапката үөрүүлээх быһыыга арылынна. Ил Түмэн Судаарыстыбаннаһын мунньаҕын бэрэссэдээтэлин солбуйааччыта Антонина Афанасьевна Григорьева, тас дойдулар норуоттарын кытта сибээстэһии министрин солбуйааччыта Сергей Александрович Хатылыков, Ил Түмэн сүбэһитэ, бочуоттаах үлэһитэ Анастасия Николаевна Божедонова, СР художниктарын Союһун председателэ Ольга Афанасьевна Скорикова, Нам улууһун МТ баһылыгын солбуйааччыта Петр Васильевич Абрамов кыттыыны ыллылар, үлэлэр үрдүк таһымнаахтарын, саха дьахтара үлэлэриттэн быыс булан норуот төрүт ииһин тута сылдьарын, олох сиэринэн тупсаран иһэллэрин тоһоҕолоон бэлиэтээтилэр. Биир үөрүүлээх сонунунан Ил Түмэн мунньаҕа төрүт иис - уус көмүскэллээх буолар сокуонун оҥороннор, олоххо киирээри турарын иһитиннэрдэ. Иистэнньэҥнэргэ, маастардарга махтал суруктары туттардылар. Бу быыстапкаҕа Хаҥалас, Таатта, Үөһэ Бүлүү, Ньурба, Орто Халыма, Кэбээйи, Нам, Мирнэй иистэнньэҥнэрин үлэлэрэ дьон- сэргэ көрүүтүгэр турдулар.  Бу улахан тэрээһиҥҥэ Анна Николаевна эскизтарынан эдэр ыччат модата "Ойкумен" диэн ааттаах коллекциятын индустриально педагогическай колледжын студеннара Матрена Захарова технолог салалтатынан тикпит үлэлэрин көрдөрдүлэр. Бу манна  нэһилиэкпититтэн Н В. Соропова салайар  "Кырадаһын" түмсүү, И.Н. Докторова көбүөрдэрэ турдулар. Ону тэҥинэн     Соропова Н.В, Докторова И.Н,"Сайдам"НАДь директора Ефремова Е.В,методиһа Наумова У.Г эҕэрдэ  суруктарынан уонна бэлэхтэринэн Ил  Түмэнтэн уонна Тас дойдулар норуоттарын кытта сибээстэһии министрыттан наҕараадаланнылар. Ахсынньы ыйга бу бэлиэ даталарга аналлаах быыстапка Государственнай Дума киэҥ уораҕайыгар турара былааннанар.