Докторов Николай Петрович.

          Докторов Николай Петрович 1930 сыллаахха муус устар 20 күнүгэр Уус Алдан оройуонун 2 Өспөх нэһилиэгэр колхозтаах бааһынай дьиэ кэргэнигэр төрөөбүтэ. 1939 с. Орто Эбэ 7 кылаастаах оскуолатыгар үөрэнэ киирбитэ уонна 4 –с кылааһы бүтэрэн баран сэрии ыар сылларыгар салгыы үөрэммэтэҕэ.  Сэрии сылларыгар дойдутугар Арыылаах колхозка араас үлэҕэ улахан дьону кытта тэҥҥэ үлэлэспитэ, сыралаах үлэтэ үрдктүк сыаналанан 1941-1945 с.с. Аҕа дойду сэриитигэр килбиэннээх үлэтин иһин мэтээлинэн наҕараадаламмыта.

          1950 с. Нам оройуонун Хатырык нэһилиэгин кыыһын Куличкина Мавра Федотовнаны кэргэн ылар уонна көһөн кэлэн М.К.Аммосов аатынан колхозка , кэлин совхозка 1990 с. диэри үксүн тутуу биригээдэтигэр маастар быһыытынан сылдьыбыта. Элбэх производственнай тутуулары туппута.  Ол иһигэр дьааһыла, культура, спортзал дьиэлэрэ, элбэх хотоннор, чааһынай дьиэлэр. Быстах Мехколхозстрой диэн тэрилтэҕэ үлэлээн Арбыҥҥа, Түбэҕэ, Модукка, Көбөкөҥҥө тутууга үлэлээбитэ.

          1972 с. тыа хаһаайыстыбатынсоциалистическай куоталаһыытын туйгуна знагынан, Үлэ, тыыл ветерана знактарынан наҕараадаламмыта.

          Николай Петрович самодеятельность актыыбынай кыттыылааҕа, алгысчыт, тойуксут, оһуохайдьыт этэ. Юбилейнай ыһыахтарга куруутун ыҥырыкка сылдьан алгыыра. Туойара.

Олоҕун доҕорунаан Мавра Федотовналыын 49 сыл бииргэ олорбуттара. 8 оҕону төрөтөн, улаатыннаран үлэһит дьон оҥортообуттара.

Николай Петрович 1999 сыл алтынньы 10 күнүгэр соһуччу ыалдьан олохтон туораабыта.

Кыыһа Ирина Николаевна Докторова суруйда.

1.11.2020 с. Хатырык