Бүгүн Алтынньы 23 күнүгэр Хатырык нэһилиэгэр үөрүүлээх, долгутуулаах тэрээһин ааста. Дьокуускай-Нам-Булуус хайысхалаах Нам-Хатырык суолу, аныгы ирдэбилинэн, саҥардааһын үлэтин түмүктүүр, үөрүүлээх быһыыга-майгыга арыйар тэрээһин ыытылынна.

Бу тэрээһиҥҥэ Саха Өрөспүүблүкэтин тыраанспар уонна суол хаһаайыстыбатын миниистирэ Владимир Михайлович Сивцев, Саха Өрөспүүблүкэтин массыына суолун управлениетын генеральнай дириэктэрэ Семен Васильевич Филиппов, Саха Сирин Бырабыытылстыбатын уонна Саха Сирин администрациятын бэйэни салайыныы департаменын салайааччыта Иван Романович Попов, “Нам улууһа” МТ баһылыга Юрий Иннокентьевич Слепцов, Нам улууһун депутааттарын сэбиэтин бэрэссэдээтэлэ Алексей Иванович Винокуров күндү ыалдьыт буолан, асфальт суол саҥардыллыбытынан Хатырык нэһилиэгин олохтоохторун истиҥник эҕэрдэлээтилэр.

Тэрээһиҥҥэ саҥа суол эриэ-дэхси сырыылаах, өссө сайдарын туһугар, Алексей Михайлович Пинигин алгыс тылын эттэ, “Уйгу” ырыа ансаамбыла (салайааччы Левина Л.И.) олохтоох ааптар В.Т. Васильев-Эрчим Баһыл суруйбут ырыа буолбут хоһоонун “Хатырыкпын таптыыбын” ыллаан дьиэрэттэ, “Саһарҕа” үҥкүү бөлөҕүн кыргыттара (салайааччы Колодезникова Л.А.) сахалыы таҥастаах тэрээһиҥҥэ күүс-көмө буоллулар.

Суолу саҥардыыга ООО “СУ-77” тэрилтэтэ (генеральнай дириэктэр Петр Иванович Бурнашев) күнү-түүнү аахсыбакка, сүүстэн тахса киһини үптээн-хамнастаан үлэлэппиттэрин, хаачыстыбалаахтык, ирдэбилгэ эппиэттиир гына оҥорбуттарын бэлиэтээн Саха Сирин Бырабыытылстыбата, Нам улууһун администрацията, Хатырык нэһилиэгин администрацията үлэһит дьоҥҥо махтал суруктары, бочуоттаах грамоталары үөрүүлээх быһыыга майгыга туттардылар.

Саҥа суолунан маҥнайгы бочуоттаах айаны ООО “СУ-77” тэрилтэ техникалара, ону тэҥэ олохтоох суоппардар үөрэ-көтө параадтаатылар.
Саҥа суол кэлиитэ- нэһилиэкпит салалла сайдарыгар төһүү буолуо, айан-сырыы кэҥииригэр, саҥа ыаллар олохсуйалларыгар табыгастаах буолуоҕа диэн эрэнэбит.