Ырыаҕа ылланар, хоһооҥҥо хоһуллар үс үллэр үөстээх Өлүөнэ эбэбит орто сүүрүгэр тайаан сытар, үрдүк мыраантан өҥөйөн көрдөххө уйаара-кэйээрэ биллибэт киэҥ Эҥсиэли хочобут хоҥкунуур кубалаах, кэхтибэт кэрэ айылҕалаах, уос номоҕор киирбит үтүөкэн талааннаах дьоннордоох!

Муус устар 5 күнүгэр Дьокуускай куоракка А.Е. Кулаковскай-Өксөкүлээх Өлөксөй аатынан норуоттар доҕордоһууларын дьиэтигэр, “Симэх” норуот уус-уран оҥоһуктарын киинигэр  Саха Автономията төрүттэммитэ 100, Саха сирин уһулуччулаах государственнай уонна политическай деятелэ Максим Кирович Аммосов 125, Хатырык нэһилиэгэ төрүтэммитэ 385 сылларыгар аналлаах «Өй сүрэх аайытын Эн аатыҥ!»,  төрөөбүт төрүт түөлбэбит Хатырыкпыт сириттэн, кэрэ эйгэни төрүттүүр, үтүө эйгэни  үйэтитэр, айар-тутар дьоҕурдаах, оһуорунан ойуулуур, дьүһүнүнэн дьүһүйэр мындыр уустар түмсэр төрүөттээх, түһүлгэлэрин быыстапката арыллыыта буолла.

 Быыстапкаҕа живопись, кыра кээмэйдээх скульптура, кыбытык тигии, оҕуруонан, тимир, туой оҥоһуктар, кылынан, сиэлинэн өрүү уонна да атын көрүҥнэр турдулар. “Барҕарыы” фондатын лауреата, Хатырык нэһилиэгин аатырбыт худуоһунньуга, ойууһута Иннокентий Юрьевич Пестряков хартыыналара, СР норуотун маастардара, Российскай уонна Республиканскай күрэхтэр кыайыылааҕа уонна призера Прокопьева-Стручкова Прасковья Ильинична - сөрүөлэрэ уонна СР норуотун маастардара Тамара Галиновна, Валентин Титович Васильевтар туос иһиттэрэ, СР норуот уус-уран оҥоһуктарын маастара Жирохова Майя Семеновна мамонт муоһуттан киэргэллэрэ, туойдьут биир дойдулаахпыт Адамова Мария Прокопьевна, кыбытык тигии Винокурова Марта Васильевна, «Кырадаһын» түмсүү кыттыылаахтарын үлэлэрэ, тимир уустара Пинигин Алексей Михайлович, Мухин Сайаан Николаевич сытыы биилээхтэрэ, Левин Михаил Александрович мельхиортан киэргэллэрэ, полимернай пластиктан шарнирнай уонна фоамирантан куукулалар - Бугаева Пелагея Васильевна, бары өттүгэр талааннаах Степанова Мария Валентиновна фанераттан оҥорбут пазлара, олонхо дьоруойдара,  Васильева Софья Валентиновна пенопластан, армирующей састаабтаах табачаанын кытта хараҥаҕа тыгар хартыыната, кыл-сиэл оҥоһуктаах Попова Александра Васильевна, Константинова Таисия Григорьевна, Васильева Светлана Дмитриевна, Ноговицына Аксинья Афанасьевна, Павлова Екатерина Константиновна, Попова Христина Егоровна, саха таҥаһын иистэнньэҥэ Наумова Прасковья Дмитриевна, М.К. Аммосов аатынан СР государственноһын историятын түмэлин Аммосов олоҕун сырдатар көһө сылдьар стиэндэтэ, М.А. Охлопкова аатынан модельнай библиотека кинигэ быыстапката, ону тэҥэ оскуола оҕолорун Шадрина Саша, Обутова Аэлита, Обутова Люба (салайааччы Лукина Венера Николаевна) уонна Н.Н. Атласов аатынан оҕо искусствотын оскуолатын уруһуй кылааһын үөрэнээччилэрин (сал.  Петров Григорий Афанасьевич) үлэлэрэ көрөөччү киэҥ араҥатыгар таҕыстылар.

Быыстапка үөрүүлээх арыллыытыгар СР культуратын миниистирин маҥнайгы солбуйааччыта Владистав Валерьевич Левочкин, “Хатырык нэһилиэгэ” МТ баһылыга Юрий Вячеславович Дьяконов, “Симэх” норуот уус-уран оҥоһуктарын киинин салайааччыта Яна Викторовна Игнатьева, Нам түмсүү салайааччыта Гаврил Гаврильевич Местников эҕэрдэ тыл эттилэр, ону тэҥэ Иннокентий Юрьевич Пестряков кэргэнэ Варвара Семеновна Пестрякова, Россия худуоһунньуктарын уонна суруналыыстарын союһун чилиэнэ - Анна Николаевна Зверева, Валентина Готовцева, "Махсыым уолаттара", Маймаҕа нэһилиэгиттэн Ньургустаана Лебедева, Игнатьев Виктор Викторович ырыанан, тойугунан, алгыс тыланан киэргэттилэр, ону тэҥэ Хатырык нэһилиэгин общественноһа, Дьокуускай куоракка олорор биир дойдулаахтарбыт күндү ыалдьыт буолан кыттыыны ыллылар.

Саха дьоно барыга бары сыһыаннаах, талааннаах, мындыр. Иистэнии, уһаныы кэскиллээх дьыала буоларын умнубакка, үгүс кэрэ үлэни иитэн таһаара туруоҕуҥ, дойдубут сайдыытын биир ураты күүһэ - иистэнэр, уһанар уран тарбахтаахтар буолаллар.

Билиҥҥи сайдыылаах кэмҥэ бэйэбит үтүө үгэспитин умнубакка көлүөнэттэн көлүөнэҕэ утумнаан, иитэн, тиэрдэн иһиэҕин.

Быыстапка кыттыылаахтарыгар, тэрийиигэ күүс-көмө буолбут дьоммутугар барҕа махтал буолуохтун. Эһиэхэ баҕарабыт кытаанах доруобуйаны, айар-тутар үлэҕитигэр үтүмэн ситиһиини!